وزارت صحت و روک تھام (ایم او ایچ اے پی) نے ماڈرنا کی کوویڈ-19 ویکسین کی ہنگامی رجسٹریشن کی منظوری دے دی ہے۔ یہ فیصلہ کلینیکل ٹرائلز کی تکمیل اور ویکسین کے مقامی ہنگامی استعمال کی منظوری کے ساتھ ساتھ امریکی فوڈ اینڈ ڈرگ ایڈمنسٹریشن (ایف ڈی اے) کی منظوری کے بعد کیا گیا ہے۔

ہیلتھ ریگولیٹری سیکٹر کے اسسٹنٹ انڈر سیکرٹری ڈاکٹر امین حسین العامری نے کہا کہ طبی آزمائشوں سے پتہ چلا ہے کہ ویکسین محفوظ اور مؤثر ہے اور کوویڈ-19 اینٹی باڈیز تیار کرنے کے علاوہ مدافعتی ردعمل کو متحرک کر رہی ہے۔

میجنٹا انویسٹمنٹس کے منیجنگ ڈائریکٹر ڈاکٹر زاہد السبتی نے کہا کہ دنیا کوویڈ-19 وباء کے شدید اثرات برداشت کر رہی ہے، ایسے وقت میں ہمیں یہ اعزاز حاصل ہے کہ ہم متحدہ عرب امارات میں اس انتہائی جدید ویکسین کو دستیاب کروا کر انسانیت کے تحفظ کو بڑھانے کی عالمی کوششوں میں حصہ لے رہے ہیں۔ انہوں نے مزید کہا کہ میجنٹا اس وباء پر قابو پانے کی کوششوں میں متحدہ عرب امارات کی حکومت کی کاوشوں کی حمایت کرنے کے لیے مکمل طور پر پرعزم ہے۔

ماڈرنا کے چیف کمرشل آفیسر کورین لی گوف نے کہا کہ ہم متحدہ عرب امارات میں اپنی ویکسین کی تقسیم کے لیے میجنٹا کے ساتھ مل کر کام کرنے کے موقع کا خیرمقدم کرتے ہیں۔ ہم اپنے شراکت داروں کے ساتھ مل کر امید کرتے ہیں کہ عالمی سطح پر اپنی ویکسین تک رسائی بڑھانے کے اپنے مقصد کو آگے بڑھائیں گے اور متحدہ عرب امارات کی طرح باقی حکومتوں کو بھی اپنے شہریوں، رہائشیوں اور سیاحوں کو اس وباء سے بچانے میں مدد دیں گے۔

اماراتی نیوز ایجنسی (ڈبلیو اے ایم)